ਕੈਨੇਡਾ ਵਿੱਚ ਜੰਮੀ ਪਲ਼ੀ ਪੀੜ੍ਹੀ ਨੂੰ ਅੰਗਰੇਜ਼ੀ ਭਾਸ਼ਾ ਵਿੱਚ ਕਵਰ ਕੀਤਾ ਗਿਆ ਹੈ

ਗਰੇਵਾਲ : ਕੈਲਗਰੀ:’ਯੰਗਸਿਤਾਨ’ ਰਸਾਲੇ ਦਾ ਫੀਲਡ ਹਾਕੀ ਬਾਰੇ ਵਿਸ਼ੇਸ਼ ਅੰਕ ਇੱਥੇ ਜਾਰੀ ਕਰ ਦਿੱਤਾ ਗਿਆ ਹੈ 84 ਪੰਨਿਆਂ ਦੇ ਇਸ ਅੰਕ ਵਿੱਚ ਪੰਜਾਬੀ ਅਤੇ ਅੰਗਰੇਜ਼ੀ ਭਾਸ਼ਾਵਾਂ ਵਿੱਚ ਲੇਖ ਛਾਪੇ ਗਏ ਹਨ।ਰਸਾਲੇ ਦੇ ਸੰਪਾਦਕ ਸੁਖਵੀਰ ਗਰੇਵਾਲ ਨੇ ਦੱਸਿਆ ਕਿ ਪਲੇਠੇ ਅੰਕ ਵਿੱਚ ਫੀਲਡ ਬਾਰੇ ਵਿਸ਼ੇਸ਼ ਲੇਖਾਂ ਤੋਂ ਇਲਾਵਾ ਕੈਨੇਡਾ ਅਤੇ ਅਮਰੀਕਾ ਦੇ ਫੀਲਡ ਹਾਕੀ ਟੂਰਨਾਮੈਟਾਂ ਦੀ ਕਵਰੇਜ ਪੰਜਾਬੀ ਅਤੇ ਅੰਗਰੇਜ਼ੀ ਵਿੱਚ ਛਾਪੀ ਗਈ ਹੈ।
          ਪ੍ਰਿੰਸੀਪਲ ਸਰਵਣ ਸਿੰਘ ਦਾ ਸਿੱਖ ਹਾਕੀ ਖਿਡਾਰੀਆਂ ਬਾਰੇ ਲੇਖ ਇੱਕ ਖੋਜਪੂਰਨ ਲੇਖ ਹੈ।ਇਸ ਲੇਖ ਵਿੱਚ ਉਹਨਾਂ ਨੇ ਉਹਨਾਂ 137 ਹਾਕੀ ਉਲੰਪੀਅਨਾਂ ਬਾਰੇ ਜ਼ਿਕਰ ਕੀਤਾ ਹੈ ਜੋ ਦੁਨੀਆਂ ਭਰ ਦੇ 9 ਮੁਲਕਾਂ ਵਲੋਂ ਖੇਡੇ।ਇਹ ਲੇਖ ਇਸ ਗੱਲ ਦੀ ਗਵਾਹੀ ਭਰਦਾ ਹੈ ਕਿ ਚੰਗੇ ਭਵਿੱਖ ਦੀ ਖਾਤਿਰ ਪੰਜਾਬੀ ਦੁਨੀਆਂ ਦੇ ਜਿਸ ਮੁਲਕ ਵਿੱਚ ਵੀ ਗਏ ਉਹ ਹਾਕੀ ਨੂੰ ਨਾਲ਼ ਲੈ ਕੇ ਗਏ ।ਪੰਜਾਬੀਆਂ ਨੇ ਮਿਹਨਤ ਨਾਲ਼ ਉਹਨਾਂ ਮੁਲਕਾਂ ਵਿੱਚ ਆਪਣੇ-ਆਪ ਨੂੰ ਆਰਥਿਕ ਤੌਰ ਤੇ ਸਥਾਪਿਤ ਕਰਨ ਦੇ ਨਾਲ਼-ਨਾਲ਼ ਹਾਕੀ ਦੇ ਖੇਡ ਵਿਰਸੇ ਦਾ ਵੀ ਜਾਗ ਲਾਇਆ।
    ਭਾਰਤ ਵਿੱਚ ਇਸ ਸਮੇਂ ਹਾਕੀ ਦਾ ਜਨੂੰਨ ਸਿਖ਼ਰ ਤੇ ਹੈ।ਸਾਲ 2018 ਵਿੱਚ ਹਾਕੀ ਉਪਰ ਅਧਾਰਿਤ ਚਾਰ ਫਿਲਮਾਂ ਰਿਲੀਜ਼ ਹੋਣਗੀਆਂ।ਡਾ.ਸੁਖਦਰਸ਼ਨ ਸਿੰਘ ਚਹਿਲ ਨੇ ਬਾਲੀਵੁੱਡ ਅਤੇ ਹਾਕੀ ਦੇ ਰਿਸ਼ਤੇ ਨੂੰ ਭਲੀਭਾਂਤ ਚਿਤਰਿਆ ਹੈ।ਡਾ.ਚਹਿਲ ਦਾ ਇਹ ਲੇਖ ਇਸ ਸਾਲ ਆਉਣ ਵਾਲ਼ੀਆਂ ਫਿਲਮਾਂ ਗੋਲਡ,ਸੂਰਮਾ,ਖਿੱਦੋ-ਖੂੰਡੀ ਅਤੇ ਹਰਜੀਤਾ ਦੇ ਵਿਸ਼ਿਆਂ ਬਾਰੇ ਦੱਸ ਕੇ ਹਾਕੀ ਪ੍ਰੇਮੀਆਂ ਨੂੰ ਸਿਨੇਮਾਂ ਘਰਾਂ ਵੱਲ ਲਿਜਾਣ ਲਈ ਉਤਸ਼ਾਹਿਤ ਕਰਦਾ ਹੈ,2017 ਦਾ ਸਾਲ ਭਾਰਤੀ ਹਾਕੀ ਲਈ ਕਾਫੀ ਚੰਗਾ ਰਿਹਾ ਹੈ।ਪੂਰੇ ਸਾਲ ਦਾ ਲੇਖਾ-ਜੋਖਾ ਨਵਦੀਪ ਸਿੰਘ ਗਿੱਲ ਨੇ ਆਪਣੇ ਲੇਖ ਵਿੱਚ ਕਰਕੇ ਪਿਛਲੇ ਸਾਲ ਦੀਆਂ ਯਾਦਾਂ ਨੂੰ ਪਾਠਕਾਂ ਦੇ ਸਾਹਮਣੇ ਰੂਪਮਾਨ ਕੀਤਾ ਹੈ।
    ਸਨਵੀਰ ਜੱਸੜ ਦੇ ਲੇਖ ‘ਸੱਟ-ਪਿੱਛੇ ਹੱਟ’ਨੂੰ ਵੀ ਪਾਠਕਾਂ ਨੇ ਬੇਹੱਦ ਸਲਾਹਿਆ ਹੈ ।ਖਿਡਾਰੀਆਂ ਨੂੰ ਲਗਦੀਆਂ ਸੱਟਾਂ ਤੋਂ ਬਾਅਦ ਉਹਨਾਂ ਦੀ ਖੇਡ ਮੈਦਾਨ ਵਿੱਚ ਵਾਪਸੀ ਬਾਰੇ ਇਸ ਲੇਖ ਵਿੱਚ ਬਿਆਨਿਆ ਗਿਆ ਹੈ।ਪੰਜਾਬੀ ਭਾਈਚਾਰੇ ਵਲੋਂ ਕੈਨੇਡਾ ਅਤੇ ਅਮਰੀਕਾ ਵਿੱਚ ਫੀਲਡ ਹਾਕੀ ਟੂਰਨਾਮੈਂਟ ਵੱਡੀ ਪੱਧਰ ਤੇ ਕਰਵਾਏ ਜਾਂਦੇ ਹਨ।ਸਾਲ 2017 ਦੌਰਾਨ ਹੋਏ ਟੂਰਨਾਮੈਂਟਾਂ ਦੀ ਇਸ ਮੈਗਜ਼ੀਨ ਵਿੱਚ ਫੋਟੋਆਂ ਸਮੇਤ ਕਵਰੇਜ਼ ਰਸਾਲੇ ਦੀ ਦਾ ਕੇਂਦਰ ਹੈ।ਪੰਜਾਬੀ ਭਾਈਚਾਰੇ ਦੀ ਕੈਨੇਡਾ ਵਿੱਚ ਜੰਮੀ ਪਲ਼ੀ ਪੀੜ੍ਹੀ ਨੂੰ ਅੰਗਰੇਜ਼ੀ ਭਾਸ਼ਾ ਵਿੱਚ ਕਵਰ ਕੀਤਾ ਗਿਆ ਹੈ।ਫੀਲਡ ਹਾਕੀ ਬਾਰੇ ਪਹਿਲੀ ਵਾਰ ਛਪੇ ਇਸ ਮੈਗਜ਼ੀਨ ਦਾ ਕੈਨੇਡਾ ਅਤੇ ਅਮਰੀਕਾ ਦੀਆਂ ਫੀਲਡ ਹਾਕੀ ਕਲੱਬਾਂ ਵਲੋਂ ਭਰਵਾਂ ਸਵਾਗਤ ਕੀਤਾ ਗਿਆ ਹੈ।